Nini manina

Ziinyibib' ezivumba limyol' ezikhul' emigxobhozweni
Mbejembej' ubuhle bazo naxa zikhul' ezingxondorheni
Ubuhl' obunomtsalane kwizizwe kunye neentlanga
Kowu kambe kunje nje nje kwelilizwe nini manina

Intong' entle kalok' ikhiw' ezizweni
Yilent' indod' ishiy' unina noyis' ekhayeni
Ihl' inyuk' imimango nemiwew' ilondl' umfazi
Ukuze kwand' amathile kuvuy' amanyange phantsi

Kalok' ubambo lwakhutshwa nguMdal' endodeni ngenjongo
Yiyo lent' esiXhosen' indod' engenamfaz' ingaselwe so
Kub' ukuz' uban' agqibelel' ekubeni yindoda
Kufunek' umfazi, nabantwan' azokondla

Zikhukukazindini eziqukeza ziqukezile
Ukuz' imiz' ibeziingqili, zithobekile
Iimvuze-mvuze ngothando, nobunono bofudo
Umonde nokunyamezel' okogqith' obembongolo

Nina manina nakhe ngengenadyudy' imilenze nem' entla
Koo-Strydom noo-Velevutha ngeyengcinezel' imihla
Nath' uNotshe, ngoku kwedini Strydom kwanele
Umthetho wamapasi kufik' ilixa lokub' uphele

"Wathint' abafazi, wathint' imbokotho, uzokufa!"
Loo mazwi nawatsho ngobukroti bamadela kufa
Nidikwe yeyokosa ngurhulumente wengcinezelo
Nikruqukile lungcikivo lwakhe nendelelo

Maz' enethole kuni, nina bazali bezizwe neentlanga
Maz' enethole kuni, nina makroti alwel' abomdaka
Huntshu kuvel' ukukhanya kweli loobawomkhulu ngenxa yenu
Kulomthathi ninguwo yanga kungangaphumi mlotha naselizweni lenu

Phambili ngamanina phambili
Silapha nje nini manina

© Viwe Simon Tshali, All rights reserved